ភ្ញាក់ផ្អើល! រតនៈ ពិសី ត្រូវនាំខ្លួនទៅកាន់តុលាការលើពាក្យបណ្តឹងមួយ ខណៈនាងថា កំពុង ដោះស្រាយតាមផ្លូវច្បាប់
រាជធានីភ្នំពេញ ៖ មហាជន ជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើល បន្ទាប់ពីប្រភពមួយធ្វើការផ្សព្វផ្សាយជាសាធារណៈ ពាក់ព័ន្ធទៅនឹងតារាចម្រៀងនាង រតនៈ ពិសី ត្រូវបានគេចាប់ខ្លួនបញ្ជូនទៅកាន់សាលាដំបូងរាជធានីភ្នំពេញ ក្រោមពាក្យបណ្តឹងថា «រំលោ.ភសេចក្តីទុកចិត្ត និងមិនបំពេញកាតព្វកិច្ចចំពោះឧបករណ៍ដែលអាចជួញដូរបាន»។
យោងតាមប្រភពពីគណនីហ្វេសប៊ុកដែលមានឈ្មោះថា «San Prum» បានបង្ហោះសារតាមបណ្តាញសង្គមថា «នារសៀលថ្ងៃទី២១ ខែមករា ឆ្នាំ២០២៤ កម្លាំងការិយាល័យព្រហ្មទណ្ឌកម្រិតធ្ងន់ នៃនាយកដ្ឋាននគរបាលព្រហ្មទណ្ឌ បានធ្វើការបញ្ជូនខ្លួនតារាចម្រៀង និងសម្តែង កែវ ពិសី ហៅ រតនៈ ពិសី ទៅកាន់សាលាដំបូងរាជធានីភ្នំពេញ ដើម្បីប្រគល់ជូនតំណាងអយ្យការសាកសួរ ក្រោយពេលចាប់ខ្លួនពីបទ រំលោ.ភលើទំនុកចិត្ត និងមិនបំពេញកាតព្វកិច្ច ចំពោះឧបករណ៍ដែលអាចជួញដូរបាន»។
គណនីហ្វេសប៊ុកខាងលើ បានបញ្ជាក់ថា «ការឃាត់ និងបញ្ជូនខ្លួនតារាសម្តែង កែវ ពិសី គឺធ្វើឡើងដោយយោងតាមពាក្យបណ្ដឹងរបស់ឈ្មោះ ផាន់ សុរិយា ភេទស្រី អាយុ៣១ឆ្នាំ ដោយបានប្តឹងចោទប្រកាន់ឈ្មោះ កែវ ពិសី ពីបទ «រំលោ.ភលើទំនុកចិត្ត និងមិនបំពេញកាតព្វកិច្ចចំពោះឧបករណ៍ដែលអាចជួញដូរ» ដែលបានប្រព្រឹត្តនៅចំណុចរាជធានីភ្នំពេញ កាលកំឡុងថ្ងៃទី១៣ ខែមេសា ឆ្នាំ២០២៣»។
គួររំលឹកថា តារាសម្តែង កែវ ពិសី សមត្ថកិច្ចធ្លាប់កោះហៅឱ្យចូលបំភ្លឺជុំវិញករណីចេញសែកគ្មានសាច់ប្រាក់ (សែកស្អុយ) តាមពាក្យបណ្ដឹងរបស់ជនរងគ្រោះដែលបានដាក់ចូលទៅនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ កាលពីថ្ងៃទី២០ ខែកញ្ញា និងថ្ងៃទី៣០ ខែតុលា ឆ្នាំ២០២៣ កន្លងទៅ។
ពាក់ព័ន្ធនឹងបញ្ហាខាងលើនេះ តារាចម្រៀងនាង រតនៈ ពិសី មិនបានធ្វើការអធិប្បាយអ្វីច្រើនជុំវិញបញ្ហាខាងលើនេះឡើយ ដោយនាងបានអះអាងប្រាប់កោះសន្តិភាពតាមសារអេឡិចត្រូនិច ដោយខ្លីថា «នាងកំពុងតែដោះស្រាយតាមផ្លូវច្បាប់» ។
នាងបញ្ជាក់ថា «ចំពោះរឿងរ៉ាវខាងលើនេះ នាងមិនអាចបកស្រាយអ្វីឱ្យបានច្រើននាពេលនេះឡើយ ដោយសារអំឡុងពេលនេះ នាងមិនអាចប្រើទូរស័ព្ទដៃបានទេ»។
ជាការកត់សម្គាល់ កាលពីកន្លងមក តារាចម្រៀងនាង រតនៈ ពិសី ក៏ធ្លាប់ផ្ទុះរឿងត្រូវគេប្តឹងដូចគ្នានេះដែរ ហើយនាងក៏បានលើកឡើងបញ្ជាក់ថា «បញ្ហាបំណុលទាំងអស់នេះ គឺនាងនឹងប្រឈមមុខដោះស្រាយ ពោលគឺមិនគេចវេសនោះទេ ប៉ុន្តែនាងទទូច និងអង្វរដល់ម្ចាស់បំណុល មេត្តាទុកពេលវេលាដល់រូបនាង នៅក្នុងការរកប្រាក់សង ព្រោះតែរូបនាងក៏ចាញ់បោ.កគេដូចៗគ្នា ហើយក៏កំពុងដាក់ពាក្យប្ដឹង កោះហៅអ្នកជំពាក់មកចូលខ្លួនដោះស្រាយ នៅអគ្គស្នងការនគរបាលជាតិ ខណៈពេលដែលអ្នកទាំងនោះកំពុងតែរត់គេចខ្លួនអស់»៕
អត្ថបទដោយ៖ FCN NEWS
