ស្រីស្អាត ព្រះ កាយច័ន្ទ បង្ហាញមូលហេតុនៅក្នុងការសម្រេចចិត្តដាក់ពាក្យប្រឡង «Miss Grand»
រាជធានីភ្នំពេញ ៖ តារាសម្តែងនាង ព្រះ កាយច័ន្ទ បានបង្ហាញនូវមូលហេតុសំខាន់ៗមួយចំនួនធ្វើឱ្យនាងសម្រេចចិត្តដាក់ពាក្យចូលរួមប្រកួតកម្មវិធី «Miss Grand Cambodia» ដែលជាកម្មវិធីមួយកំពុងតែល្បីល្បាញ និងមានអ្នកមានសមត្ថភាពជាច្រើនកំពុងចាប់អារម្មណ៍ចូលរួមការប្រកួតប្រជែង ។
ក្នុងនាមជាបេក្ខភាពមួយរូប សម្រាប់ការប្រកួត «Miss Grand Cambodia» តំបន់ភ្នំពេញ តារាសម្ដែងស្រីស្រស់ ព្រះ កាយច័ន្ទ បានបញ្ជាក់ថា «មូលហេតុដែលនាងសម្រេចដាក់ពាក្យប្រឡងក្នុងកម្មវិធីខាងលើនេះ គឺដោយសារតែនាងជឿជាក់ទៅលើសមត្ថភាពដែលនាងមាន ជាពិសេសនាងក៏ចង់ត្រួសត្រាយផ្លូវសម្រាប់កូនសិស្សរបស់នាងកំពុងបង្រៀន ដែលមានបំណងបង្ហាញសមត្ថភាពនៅលើឆាកអន្តរជាតិ» ។
ស្រីស្អាត ព្រះ កាយច័ន្ទ បានអះអាងថា «កន្លងមក នាងបានឃើញបេក្ខភាពកម្ពុជា ដែលចូលរួមប្រកួត Miss Grand គឺមិនសូវទទួលបានជោគជ័យឡើយ បើទោះបីជាបេក្ខភាពរបស់យើងមានរូបសម្រស់ និងសមត្ថភាពល្អក៏ដោយ ។ មូលហេតុនេះ គឺជាការជំរុញចិត្តរបស់នាងឱ្យចូលរួមប្រកួតក្នុងកម្មវិធីមួយនេះ ដោយសារតែនាងក៏ដឹងពីសមត្ថភាពខ្លួនឯង សម្រាប់កម្មវិធីដែលគេចង់បាន គឺមាននៅក្នុងខ្លួនរបស់នាងទាំងអស់» ។
នាងបន្ថែមថា «ប្រសិនក្នុងករណីដែលនាងអាចទៅបានហើយ តែមិនអាចទទួលលទ្ធផលណាមួយទៀតនោះ យើងនឹងបានដឹងថា តើកម្មវិធីនេះគេចង់បានបែបណា? ហើយនោះក៏ជាបទពិសោធន៍ថ្មីមួយទៀតសម្រាប់នាងផងដែរ» ។
នាងបញ្ជាក់ថា «ការចូលរួមប្រកួតរបស់នាងទៀតសោត គឺជាការត្រួសត្រាយផ្លូវសម្រាប់កូនសិស្សរបស់នាង ព្រោះបច្ចុប្បន្ន កូនសិស្សរបស់នាងទទួលបានជោគជ័យនៅក្នុងថ្នាក់ជាតិ តែសម្រាប់ឆាកអន្តរជាតិនោះ គឺមិនទាន់ឡើយ។ ហេតុនេះ នាងនឹងនាំយកបទពិសោធន៍មួយនេះ មកបង្ហាញសិស្សរបស់នាង ប្រសិនបើនាងមានឱកាសបានឈានជើងដល់ឆាកអន្តរជាតិ» ។
ជាការកត់សម្គាល់ ទស្សនិកជនដែលជាអ្នកលេងបណ្តាញសង្គម បាននាំគ្នាសម្តែងការភ្ញាក់ផ្អើលយ៉ាងខ្លាំង ក្នុងពេលដែលស្ងាត់ៗ ស្រាប់តែគេឃើញតារាសម្តែង ព្រះ កាយច័ន្ទ លេចវត្តមានចូលរួមប្រឡងក្នុងកម្មវិធី «Miss Grand Cambodia 2024»។ ខណៈពេលដំណឹងមួយនេះ ក៏បានធ្វើឱ្យទស្សនិកជនដែលជាអ្នកគាំទ្ររូបនាងជាច្រើន សម្តែងការអបអរសាទរ និងគាំទ្រយ៉ាងពេញទំហឹង ក្នុងពេលពួកគេចង់ឃើញតារាស្រីរូបនេះ ចូលរួមប្រកួតកម្មវិធីផ្នែកសម្រស់បែបនេះជាយូរមកហើយ ដោយសារតែនាង គឺជាមនុស្សមានទាំងសមត្ថភាព រូបសម្រស់ និងចំណេះដឹងសមស្របសម្រាប់កម្មវិធីមួយនេះ។
សម្រាប់ការដាក់ពាក្យប្រឡងក្នុងកម្មវិធីខាងលើ ស្រីស្អាត ព្រះ កាយច័ន្ទ បានប្រកាសពីការតាំងចិត្តរបស់នាងថា «នាងដាក់ពាក្យប្រកួត Miss Grand Cambodia ហើយ បើនាងមិនបានជាប់ទៅប្រកួតនៅ Miss Grand International ទេ នាងសុំមិនទៅប្រកួតក្នុងកម្មវិធីផ្សេងនោះទេ អរគុណដែលបងប្អូនគ្រាំទ្រ នាងនឹងមិនធ្វើឱ្យបងប្អូនអស់សង្ឃឹមឡើយ នាងនឹងព្យាយាមបន្ថែមដើម្បីកម្ពុជា»៕
អត្ថបទដោយ៖ FCN NEWS
